Piştî ku komên çekdar ketin herêmê û di navbera wan û hêzên Rejîma Esad de pevçûn derket, ev şer û pevçûn her ku çû belav bû û zirar da derdora xwe. Ji ber van êrîşan, ewlehiya welatiyan nema û koçberî dest pê kir. Gelek welatiyên ku mal û milkê xwe terk kirin û hatin Serêkaniya Rihayê, niha bê cih û war mane û perîşan in. Hêzî 5 hezar welatî koçî Serêkaniyê kirin û niha li gel malbatên Serêkaniyê dijîn. Bi hezaran welatî jî niha di xaniyên înşaet û konên ku li hewşên malan ava kirine de dimînin. Gelek ji wan jî, di xaniyekî yek ode de bicih bûne.

 'Em hewl didin ku bibin alîkar'

Şaredarê Serêkaniyê Ismail Arslan, diyar kir ku welatiyên ku koçî Serêkaniyê kirine, di nava şert û mercên xerab de dijîn û hewl didin ku bibin alîkarên wan. Arslan, da zanîn ku komên çekdar ên Serêkaniyê di nava xwînê de hiştin, dixwazin tevliheviyê bikin û hêza xwe ji derve digirin. Dayika Edla Hesen ku li taxa Aydinê ya Serêkaniyê di konê de bi 8 zarokên xwe re dijî, diyar kir ku ji bo zarokên xwe ji çek û topan biparêze, reviyaye, hatiye Serêkaniya Rihayê û wiha got: "Em ji rêxistina BDP'ê Şaredariyê û welatiyên din alîkariyê digirin."

5 malbat di xaniyekî de dijîn

Li taxa Cumhuriyetê jî 5 malbatên ji Serêkaniya binxetê koç kirine, li hev kom bûne û di xaniyekî de bi cih bûne. Dayîka bi navê Eyşe Abdulkadir, diyar kir ku carekê hatin û piştre li ser banga rayedarên fermî dîsa li Serêkaniya binxetê vegeriyan. Abdulkadir, da zanîn ku piştî vegeriyane, rastî êrîşên komên çekdar û hêzên Esed hatine û wiha got: "Edî baweriya me bi çeteyan û hêzên Esad nemaye. Hemû xanî mal û milkê me talan û wêran kirin. Li wir komkujî pêk anîn. Zarokên me li vir jî nikarin bi rihetî razên." Fatîme Ezîz a 43 salî jî anî ziman ku piştî koma Ceşîl Hur (OSO) hatiye Serêkaniyê, aramiya welatiyan xerab bûye û aloziyê dest pê kiriye.

Nifûsa Serêkaniyê zêde bû

Ezîz, da zanîn ku berê di navbera kurd, ereb û suryaniyan de tu pirsgirêk tunebû û bi hatina komên çekdar re alozî zêde bûne. Ezîz wiha got: "Xaniyê me hilweşandin. Zarokên me yên 14 salî hatin kuştin. Me zarokên xwe yên mayî, bi zorê xelas kirin. Em niha li vir nêzî 30 kesan, di xaniyekî de bicih bûne." Selanik Homan jî da zanîn ku bi pevçûn û aloziyan re welatiyên Serêkaniya serxetê (Riha) jî pir bi fikar û tirs dijîn. Homan, da zanîn ku berê nifûsa Serêkaniyê 46 hezar bû niha derketiye 75 hezaran. Homan, daxuyand ku pevçûnê derûniya wan xerab kiriye û bi tirs dijîn.

• 1
• 2
• 3
• 4
• 5