Hauptseite » Online Spiele » Kurdistan

Girtiyên ji doza PKK û PAJK: Xwedî li Rojava derbikevin

29.12.2012
Amed - Li ser navê dîlên azadiyê yên ji doza PKK û PAJK’ê ku di girtîgehên Kurdistan û Tirkiyeyê de tên girtin Denîz Kaya, der barê rewşa rojavayê Kurdistanê û xwedîderketina gelê Rojava de daxuyanî da.

Kaya, diyar kir ku gelê Rojava bi birçîbûn û pirsgirêkên tenduristiyê re rû bi rû ye û ev bang kir: "Em bang li hemû hêzên kurdistanî û dostên kurdan dikin ku xwedî li gelê me yê Rojava derkevin. Divê bi awayekî lezgînî dest bi kampanyayên alîkariyê bikin û alîkariyên hatine berhevkirin demildest bişînin Rojava.” Kaya, bi bîr xist ku ji bo alîkaraya Rojava wan ji Serokê Herêma Federal a Kurdistanê Mesûd Barzanî û hikûmetê re nameyên vekirî şandine.

Kurdistaniyên li Rojava dijîn bi hêza xwe ya parastinê hemû komên çete ji Rojava qewirandin û li bajarên Rojava aramî pêk anîn. Hêzên dagirker ên ku nikaribûn bi çekdarî bi ser bikevin, dest bi pêkanîna dermirovahî ya birçîbûnê kirin. Li aliyekî deriyên sînorê Kurdistanê digirin, li aliyê din ji bo alîkariyê xebatên xurt nayên meşandin.

Kaya, diyar kir ku Tirkiye dixwaze kurdistaniyên Rojava ji cih û warên xwe koçber bikin û wiha hat gotin: "Li bajarên Rojava ji hêla balafirên rejîma Sûriyeyê ve tên bombebarankirin û ji aliyê din ve jî çeteyên xwefiroş ên Dewleta Tirk êrîşî Rojava dikin. Gelê me yê Rojava li hemberî van êrîşan li ber xwe didin û bi biryardarî gav bi gav şoreşê pêk tînin.”

Kaya bal kişand ser ambargoya ku li ser Rojava tê meşandin û ev bang li hemû kesê kir: "Gelê me yê Rojava bi pirsgirêkên wekî birçîbûn û tenduristiyê re rû bi rû ne. Hemû deriyên sînor hatine girtin. Heke bi awayekî lezgînî alîkarî ji gelê me yê Rojava re neçe, dê felaketên ku careke din nikaribin dê telafî bikin re rû bi rû bimînin. Ji ber vê yekê em bang li hemû hêzên kurdistanî û dostên kurdan dikin ku bi awayekî lezgînî xwedî li gelê me yê Rojava derkevin. Dest bi kampanyayên girseyî bikin û bi lezgînî ji gelê me re bişînin.” Kaya bang li malbatan jî kir ku bi awayekî çalak di nava kampanyayên alîkariyê de cih bigirin û tevli xebatan bibin.

NAMEYÊN VEKIRÎ ŞANDIN

Kaya, anî ziman ku wan ji Serokê Herêma Federal a Kurdistanê Mesûd Barzanî û Hikûmeta Herêma Federal a Kurdistanê re nameyên vekirî şandine û wiha berdewam kir: "Birêz Barzanî, Rojava jî perçeyek Kurdistanê ye. Gelê me yê Rojava bi xwîn û canê xwe tevli têkoşîna Kurdistanê bûye û tu caran ji fedakariyê nereviya ye. Niha Li Rojava şoreş pêk tê. Gelê me hêzên Baasê ji ser axa xwe qewirandine û azad bûne. Birêz Barzanî, di demên şoreşê de bêhtir hewceyî bi biratiyê heye. Niha dem dema nîşandana vê biratiyê ye. Ambargoya ku ji hêla hikûmeta we ve tê meşandin ji holê rakin û deriyên hatine girtin ji bo alîkariya însanî ji nû ve vekin. Birêz Barzanî, em vê nameyê di zindanên Tirkiyeyê de ji we re dişînin û hêvî dikin ku name bigihîje ber destên we. Êdî ev qîrîna gelê me yê Rojava bibihîzin û tiştê ku dikeve ser milê we bikin.”

Her wiha hat zanîn ku dîlên azadiyê ji bo gelê Rojava dest bi xebatê kirin e. Kaya der barê xebatên ku dîlên azadiyê dane destpêkirin de jî ev tişt anî ziman: "Ji bo gelê me yê Rojava ji Girtîgeha Tîpa F a Boluyê 2 hezar TL. ji Girtîgeha Tîpa Ma Midyadê jî hezar TL. pere hatine berhevkirin û ji bo gelê me yê Rojava hatiye şandin. Bila ve yek baş were zanîn ku dê dagirker winda bikin, biratî û azadî dê bi ser bikeve.” Kaya herî dawî ji bo wefata Serokê Giştî yê KADEP’ê û parlamenterê Amedê Şerafettîn Elçî xemgîniya xwe anî ziman. Kaya di serî de ji malbatê û gelê Kurdistanê re sersaxî xwest.



ANF
Bewertung: 0.0/0
Zähler: 127 | Hinzugefügt von: AdnaN3861
Kommentare insgesamt: 0
Vorname *:
Email *:
Code *: